दोराबजी जमशेदजी टाटा
अगस्तमासस्य सप्तविंशति: दिनाङ्के 1859 तमे वर्षे जात: अयं भारतस्य प्रसिद्ध: उद्योगपति: आसीत् । आरम्भिकी-शिक्षां प्राप्य स: उच्च-शिक्षाया: कृते आङ्ग्लदेशं प्रति गतवान्। स: अनन्तरं भारतम् आगत्य मुम्बईविश्वविद्यालयात् स्नातक-शिक्षां प्राप्तवान् l तदुपरान्तं स: तस्य पित्रा सह एव उद्योगे कार्ये संलग्न: जात:। स: तस्य पितु: जमशेदजीत: व्यापारस्य व्यापक-अनुभवं प्राप्तवान् । तस्य विवाह: 1897 तमे वर्षे मेहरबाई नाम्ना महिलया सह अभवत्,किन्तु तयो: कोऽपि सन्तान: न आसीत् । 1904 तमे वर्षे जमशेदजी दिवङ्गत: जात:। तस्य मृत्यो: अनन्तरं स: पूर्णतया स्वपितु: स्वप्न-पूर्णं कर्तुं संलग्न: जात: । स: टाटा-समूहस्य प्रथम-चेयरमेन आसीत् l जमशेदपूरनगरस्य विकासे तस्य एव महती भूमिका आसीत् । स: झारखण्ड-प्रदेशे इस्पात-उद्योगस्य विस्तारं कृतवान्। भारतदेशे औद्योगिक-क्षेत्रे विकासाय न केवलं तस्य महती भूमिका आसीत् अपितु स: समाजसेवाया: कृते तत्पर: आसीत् । तस्य भार्याया: मृत्यो: अनन्तरं स: “लेडी टाटा मेमोरियल ट्रस्ट” इत्यस्य स्थापनां कृतवान् । यस्य उद्देश्यं रक्तसम्बन्धि-रोगाणाम् अनुसन्धान-कार्यम् आसीत् । जीवनस्य अन्तिमवर्षेषु स: सम्पूर्ण-सम्पत्तिं सार्वजनिक-कार्य-निमित्तं दानं कृतवान्।
जून-मासस्य तृतीये दिनाङ्के 1932 तमे वर्षे स: दिवङ्गत: जात: l
